Ҷаласаи ғайринавбатии Кумитаи миллии ҳамоҳангсозии мубориза бар зидди БПНМ, сил ва вараҷа баргузор гардид

Имрўз, 13 феврали соли 2026 таҳти раёсати Вазири тандурустӣ ва ҳифзи иҷтимоии аҳолии Ҷумҳурии Тоҷикистон, муовини Раиси Кумитаи миллии ҳамоҳангсозии мубориза бар зидди бемориҳои пайдошудаи норасоии масуният, сил ва вараҷа дар Ҷумҳурии Тоҷикистон, муҳтарам Абдуллозода Ҷ.А. ҷаласаи ғайринавбатии Кумитаи миллии ҳамоҳангсозӣ баргузор гардид.

Дар  ҷаласаи мазкур аъзои Кумитаи миллии ҳамоҳангсозӣ, намояндагони як қатор вазорату идораҳо, созмонҳои байналмилалӣ ва ғайридавлатӣ ширкат намуданд.

Дар ҷаласа масъалаи гузариши вазифаи гирандаи асосии гранти Хазинаи глобалӣ дар доираи давраи грантии 8-ум (барои солҳои 2027-2029) дар самти пешгирӣ ва мубориза бар зидди ВНМО ва сил дар Ҷумҳурии Тоҷикистон аз  Барномаи Рушди Созмони Милали Муттаҳид ба Вазорати тандурустӣ ва ҳифзи иҷтимоии аҳолии Ҷумҳурии Тоҷикистон баррасӣ гардид. Аз ҷумла, муовини Вазири тандурустӣ ва ҳифзи иҷтимоии аҳолии Ҷумҳурии Тоҷикистон Амирзода А. қайд намуд, ки Вазорати тандурустӣ ва ҳифзи иҷтимоии аҳолии Ҷумҳурии Тоҷикистон тавассути сохторҳои худ солҳои тӯлонӣ дар амалишавии грантҳои Хазинаи глобалӣ ҷиҳати самаранок ва саривақт амалӣ намудани барномаҳои ВНМО ва сил фаъолона иштирок намуда истода, дар самтҳои пешгирӣ, ташхис, табобат ва нигоҳубини беморон ба дастовардҳои назаррас ноил гардидааст. Аз ҷумла, соли  2025 дар назди Вазорати тандурустӣ ва ҳифзи иҷтимоии аҳолӣ Гурӯҳи татбиқкунандаи лоиҳа ҳамчун зергирандаи гранти Хазинаи глобалӣ таъсис дода шуда,ба Вазорат гузаштани вазифаи гирандаи асосии гранти Хазинаи глобалиро дар давраи грантии 8-ум ба мақсад мувофиқ аст.

Қайд гардид, ки гузариш ба модели миллии гирандаи асосӣ дар марҳилаи навбатӣ ба як қатор омилҳо, аз ҷумла мутобиқат намудан ба сиёсати Хазинаи глобалӣ ҷиҳати дар чорчӯбаи гузариши устувори ҳаммаблағгузории Хазинаи глобалӣ таъмини амалигардонии саривақтӣ, банақшагирифташуда ва идорашавандаи грантҳо мутобиқ мебошад. Бо дарназардошти дар марҳилаи анҷомёбӣ қарор доштани гранти ҷорӣ ва дастовардҳои бадастомада Кумитаи миллии ҳамоҳангсозӣ қарор қабул намуд, ки Вазорати тандурустӣ ва ҳифзи иҷтимоии аҳолӣ ҳамчун гирандаи асосии давраи грантии 8-ум муайян карда шавад.

Дар робита ба масъалаи мазкур, аз ҷониби Кумитаи миллии ҳамоҳангсозӣ инчунин лоиҳаи “Нақшаи гузариши гирандаи асосии гранти Хазинаи глобалӣ дар доираи давраи грантии 8-ум (солҳои 2027-2029) аз Барномаи Рушди Созмони Милали Муттаҳид ба Вазорати тандурустӣ ва ҳифзи иҷтимоии аҳолии Ҷумҳурии Тоҷикистон” муҳокима ва тасдиқ гардид.